ABANCA, Afundación e o Concello de Sanxenxo presentan a mostra «Rostros das coleccións de ABANCA e Afundación»
O Concello de Sanxenxo, ABANCA e Afundación presentan a mostra de rúa «Rostros das coleccións de ABANCA e Afundación». O acto de inauguración tivo lugar hoxe na Praza do Mar, no Porto Deportivo Juan Carlos I, e contou coa asistencia do del concelleiro de Cultura, Xoán Manuel Pérez Chaves; Marité Cores, coordinadora da área de Cultura de Afundación; Victor Moralejo, director de zona Salnés de ABANCA; e Roberto Pérez, director da oficina de ABANCA en Sanxenxo. A mostra permanecerá ata o próximo 1 de setembro.
As imaxes están dispoñibles aquí.
A exposición «Rostros das coleccións de ABANCA e Afundación»
Chamamos retrato á imaxe dunha persoa reproducida en pintura, escultura, debuxo ou fotografía, que describe a apariencia e o carácter do individuo representado. Ao longo da historia da arte, o retrato foi un dos xéneros de maior prestixio, cuxo interese radica en que non só se trata dunha representación do individuo, senón que tamén nos fala das diferentes épocas históricas, os seus códigos e os seus signos de identidade. Hoxe en día, as imaxes de rostros enchen as nosas pantallas, dende as redes sociais ata as campañas publicitarias, e reflicten a nosa sociedade globalizada e conectada. Os selfies da era dixital democratizan a arte do autorretrato xogando un importante papel na construción da identidades persoais e colectivas.
Esta mostra invita explorar as diferentes interpretacións que os artistas fixeron (e fan) deste xénero, a afondar nos recordos das xentes que evocan, nas sensacións que transmiten e nas novas fórmulas que se foron introducindo desde finais do século XIX ata os nosos días, ao compás dos movementos artísticos que se van sucedendo. Unha selección de obras galegas pertencentes ás Coleccións de Arte ABANCA e Afundación de artistas como Sotomayor, Ramón Caamaño, Julia Minguillón, María Antonia Dans, Segura Torrella, Maruja Mallo, Laxeiro ou Luís Seoane, entre outros.
Esta colaboración é parte do proxecto «Corrente cultural», que considera a arte como un instrumento imprescindible para fomentar o coñecemento e o desenvolvemento colectivo. Grazas a este proxecto, Afundación, a Obra Social de ABANCA, impulsa a capilaridade da cultura en Galicia, ampliando a oferta artística alén das súas sedes e trasladándoa ás vilas galegas para desenvolver tamén nelas as actividades da entidade.